ԷՅԻՒՊ Ս. ԱՍՏՈՒԱԾԱԾԻՆ ԵԿԵՂԵՑՒՈՅ ԹԱՂԱՅԻՆ ԽՈՐՀՈՒՐԴԻ ԱՅՑԸ

Kategori: Համայնքային

PHOTO-2021-03-25-13-45-56Ն.Ա.Տ. Սահակ Բ. Պատրիարք Հայրը, 25 Մարտ 2021, Հինգշաբթի առաւօտ,Պատրիարքարանի մէջ ընդունեց Էյիւպի Ս. Աստուածածին Եկեղեցւոյ Թաղային Խորհուրդի անդամները, առաջնորդութեամբ Ատենապետ՝ Արթօ Արմանի։

Այցելուներ, եկեղեցւոյ կալուածներէն միոյն վերջնական վիճակին մասին Պատրիարք Հօր տեղեկութիւն փոխանցելու եւ իր օրհնութիւնը ստանալու համար եկած էին Պատրիարքարան։ Անոնք յայտնեցին թէ, եկեղեցւոյ կալուածներէն միոյն վրայ կառուցուած էր նոր շէնք մը, որ արդէն իսկ վարձու տրուած էր։ Վարչայիններ յայտնեցին թէ, շէնքին եկամուտը համայնքին ի նպաստ պիտի օգտագործուէր։

Պատրիարք Սրբազան Հայրը, լսելով փոխանցուած տեղեկութիւնները իր ուրախութիւնը ու հայրական գնահատանքը յայտնեց։ Քորոնա Համավարակի շրջանին երբ համայնքային հաստատութիւններու միջեւ համագործակցութիւնը առաւել եւս անհրաժեշտ կը դառնար, Ոսկեղջիւրի այս եկեղեցւոյ ներդրումը այս առումով գովելի էր։ Պատրիարք Հայրը այս առիթով օրհնեց այցելուները եւ մաղթեց որ իրենց գործունէութիւնը յարատեւ ըլլայ։