ՀԱՅ ԱՌԱՔԵԼԱԿԱՆ ԵԿԵՂԵՑՒՈՅ ՊԱՏՈՒԻՐԱԿՈՒԹԻՒՆԸ ՀՌՈՄ ՀԱՍԱՒ ՍՈՒՐԲ ԱԹՈՌԻ ՍԱՐՔԱԾ ՀՈԳԵՃԱՇԻՆ ՄԷԿՏԵՂՈՒԵՑԱՆ ՀՈԳԵՒՈՐ ՊԵՏԵՐԸ

Kategori: Միջեկեղեցական

Հռոմի Քահանայապետ Երանաշնորհ Յովհաննէս Պօղոս Բ. Պապի յուղարկաւորութիւնն իսկ վերածուեցաւ քրիստոնէից միութեան նուիրուած համագումարի մը։ Արեւելքէն մինչեւ արեւմուտք Ուղղափառ, Կաթոլիկ կամ Բողոքական, քրիստոնէական բոլոր աւանդութիւններու պատկանող Եկեղեցիներու ներկայացուցիչներ հաւաքուեցան յիշատակը յարգելու համար Հռոմի Ս. Քահանայապետին։

Ն.Ա.Տ. Մեսրոպ Սրբազան Պատրիարք Հայրը եւս, ուղեկցութեամբ Պատրիարքական Աթոռի միաբան` Հոգշ. Հ. Թաթուլ Աբղ. Անուշեանի երէկ, 7 Ապրիլ Հինգշաբթի, ժամը 15։30-ին Պատրիարքարանէն մեկնեցաւ դէպի Հռոմ։ Նորին Ամենապատուութիւնը նախ Ս. Աստուածածին Աթոռանիստ Մայր Եկեղեցի մտաւ ու կատարեց Ճանապարհի Աղօթքը։ Ապա Եշիլգիւղի օդակայանին մէջ հանդիպեցաւ Օրթոտոքս Եկեղեցւոյ Ծայրագոյն Պատրիարք` Նորին Սրբութիւն Բարթոլոմէոս Ա. Պատրիարքին։ Բարձրաստիճան եկեղեցականներուն բարի ճանապարհ մաղթելու համար օդակայան կը գտնուէին Յունաստանի Աւագ Դեսպանը, Յունաստանի Ստանպուլի Աւագ Հիւպատոսը, Յունաց Պատրիարքութեան պաշտօնեաները, Հայոց Պատրիարքարանի Դիւանապետ` Արժ. Տ. Գրիգոր Աւ. Քհնյ. Տամատեան եւ այլ հոգեւորականներ։

Ժամը 17։00ին թռիչք առաւ Յունաց Պատրիարքին յատուկ սաւառնակը, որով ճամբորդելու հրաւիրուած էր նաեւ Հայոց Պատրիարքը։ Պատրիարքներուն կ՚ուղեկցէին նաեւ Իմրոզի Յունաց Մետրոպոլիտը եւ քանի մը այլ պաշտօնեաներ։

Պատրիարքները Հռոմ փոխադրող սաւառնակը տեղական ժամով 18։00ին վայրէջք կատարեց Հռոմի զինուորական օդակայանը, ուր պատրիարքները դիմաւորուեցան Կաթոլիկ Եպիսկոպոսի մը գլխաւորած պատուիրակութեան կողմէ։

Պատրիարքներու ինքնաշարժը ոստիկաններու կողմէ առաջնորդուեցաւ դէպի Վատիկան, ուր անոնք Ս. Պետրոս Մայր Տաճարը մտնելով յարգանքի լռութիւն պահեցին եւ աղօթեցին Յովհաննէս Պօղոս Բ. Սրբազան Պապի դիակին առջեւ, զոր զգեցուցած էին կարմիր քղամիդ եպիսկոպոսական տարազով։

Պատրիարքները ապա առաջնորդուեցան Աուրէլիա հիւրանոցը։
Պատրիարք Հայրերու հիւրանոց հասնելէն շուրջ ժամ մը յետոյ հիւրանոց ժամանեց նաեւ Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը, որուն կ՚ընկերանային Գերշ. Տ. Խաժակ Ս. Արք. Պարսամեան, Հոգշ. Հ. Գեղարդ Աբղ Վահունի եւ Հռոմ ուսանող խումբ մը աբեղաներ։
Մեսրոպ Պատրիարք իրեն յատկացուած յարկաբաժնին մէջ ընդունեց նախ Ս. Էճիտիօ միաբանութեան անդամ եւ Հռոմի մէջ Սրբազան Պապի փոխանորդ Կարտինալ Կամիլլօ Ռուինիի ներկայացուցիչ Գերյ. Մարկօ Նյավի վարդապետը եւ անմիջապէս յետոյ Քրիստոնէից Միութեան Քահանայապետական Խորհուրդի նախկին նախագահ Կարտինալ Ուոլթըր Քէսփըրը, որոնք բարի գալուստ մաղթելու եկած էին։ Բարե գալուստ մաղթելու համար Պատրիարք Հօր հետ հեռաձայնով կապ հաստատեց նաեւ Կարտինալ Միրոսլավ Վըլք, որ անցեալ տարի Պատրիարքարան այցելած էր։
Ապա  Ժամը 20։30–ին հիւրանոցի ճաշարանին մէջ Ամեն Ս. Պատրիարքը եւ Ամենայն Հայոց Հայրապետը ողջագուրուեցան իրարու հետ։ Այնտեղ էին նաեւ Օրթոտոքսներու Ծայրագոյն Պատրիարք` Ն. Սրբութիւն Բարթոլոմէոս Ա.ը, Եթովպիոյ Պատրիարք Ապունա Պաւլոսը, Յունաստանի, Մոլտաւիոյ եւ Ալպանիոյ Օրթոտոքս Արքեպիսկոպոսները եւ բազմաթիւ այլ բարձրաստիճան դէմքեր։ Այստեղ Հռոմի Սուրբ Աթոռին կողմէ սարքուեցաւ հոգեճաշ։ Շուրջ կէս ժամ յետոյ ժամանեց նաեւ Ն.Ս.Օ.Տ.Տ. Արամ Ա. մեծի Տանն Կիլիկիոյ Կաթողիկոսը, ուղեկցութեամբ Գերշ. Տ. Նարեկ Ս. Եպսկ. Ալեմէզեանի։ Ճաշու աւարտին նախ խօսք առաւ Կարտինալ Քէսփըր, որ բոլորին շնորհակալութիւն յայտնեց իրենց ներկայութեան համար, որ անկասկած, ըսաւ ան, §Քրիստոնէից միութեան վկայութիւն մը պիտի ըլլայ բոլոր աշխարհին առջեւ¦։
Ապա հուսկ բանքը խօսեցաւ Բարթոլոմէոս Պատրիարքը, որ անդրադարձաւ հանգուցեալ Քահանայապետի բարեմասնութիւններուն։
Իսկ երէկ, 8 Ապրիլ, Ուրբաթ, Հոգեւոր Պետերը առաւօտեան 09.00-ին նախ հաւաքուեցան Ս. Պետրոս Մայր Տաճարի Ս. Յովհան Ոսկեբերան մատրան մէջ։ Ապա անոնք ըստ կարգի եւ աստիճանի թափօրով առաջնորդուեցան Ս. Պետրոս Մայր Տաճարի շքամուտքի առջեւի դարաւանդը, որուն աջակողմը յատկացուած էր Լատին Կաթոլիկև Արեւելեան Կաթոլիկ եւ Արեւելեան Ուղղափառ եկեղեցիներու հոգեւոր պետերուն կամ ներկայացուցիչներուն։ Իսկ դարաւանդին ձախակողմը տեղ յատկացուած էր Երանաշնորհ Քահանայապետին իրենց յարգանքի վերջին տուրքը մատուցանելու համար Վատիկան ժամանած պետական, դիւանագիտական, քաղաքական պատուիրակութիւններու եւ Հանգուցեալի յարկաբաժնին մէջ ծառայած պաշտօնեաներուն եւ մերձաւորներուն։ Յուղարկաւորութեան հետեւեցան միլիոնաւոր հաւատացեալներ։
Յուղարկաւորութեան Ս. Պատարագը մատուցանեց Կարտինալ Ժոզէֆ Րաձինկէր, որուն հետ համապատարագեցին շուրջ 117 կաթոլիկ պատրիարքներ եւ կարտինալներ։ Արարողութիւնը տեւեց շուրջ երեք ժամ, որուն աւարտին պաշտօնեաներ Երանաշնորհ Քահանայապետի նոճիի պարզ փայտէ շինուած պարզ դագաղը իրենց ուսերուն վրայ առին ու փոխադրեցին Մայր Տաճարի ներքնայարկը, ուր եւ կատարուեցաւ թաղման կարգը։
Աուրելիա հիւրանոցին մէջ, Բարթոլոմէոս Ա եւ Մեսրոպ Պատրիարքները ողջագուրուեցան եւ հրաժեշտ առին Կարտինալ Ժոզէֆ Րաձինկէրէն, Գարեգին Բ եւ Արամ Ա Կաթողիկոսներէն եւ միւս բարձրաստիճան հոգեւորականներէն եւ 16.30ին ճամբայ ելան դէպի զինուորական օդակայան, ուր Յունաց Պատրիարքին յատկացուած ութ հոգինոց սաւառնակով վերադարձան Պոլիս։

  • 9
  • 10