ՂԱԼԱԹԻՈՅ Ս. ԳՐԻԳՈՐ ԼՈՒՍԱՒՈՐԻՉ ԵԿԵՂԵՑԻՆ ԿԸ ՊԱՏՐԱՍՏՈՒԻ ՊԱՇՏԱՄՈՒՆՔԻ ՎԵՐԱԲԱՑՄԱՆ

Kategori: Կրօնական,Համայնքային

23319382_856555464504338_6862752356283886080_nՊատրիարքական Տեղապահ Բարձր. Տ. Գարեգին Արքեպս. Պէքճեան, 10 Նոյեմբեր 2017, Ուրբաթ, Պատրիարքարանի մէջ ընդունեց, Ղալաթիոյ Ս. Գրիգոր Լուսաւորիչ Եկեղեցւոյ Հոգեւոր Հովիւ՝ Հոգշ. Տ. Զատիկ Վրդ. Պապիկեանը, Ատենապետ՝ Յարութիւն Էպէօղլուն եւ Անդամ՝ Վարդավառ Ճավաքը։

Այցելուներ Տեղապահ Սրբազան Հօր յիշեցուցին թէ, Ս. Գրիգոր Լուսաւորիչ Եկեղեցին ներքին բարեզարդման աշխատութեան պատճառաւ ժամանակէ մը ի վեր պաշտամունքի փակ էր։ Մինջ այդ, Հինգշաբթի օրեր Եկեղեցւոյ ներքնայարկի Սուրբ Ամենափրկիչ Մատրան մէջ, Ս. Պատարագ կը մատուցուէր հոգեւոր հովիւի հսկողութեամբ։ Բարեզարդման աշխատութիւնները աւարտած ըլլալով, եկեղեցին հասած էր պաշտամունքի վերաբացման փուլին։ Այցելուներ, այս առթիւ Տեղապահ Սրբազան Հօր օրհնութիւնը խնդրեցին եւ զայն հրաւիրեցին պաշտամունքի վերաբացման արարողութեանց։ Նորին Սրբազնութիւնը, իր ուրախութիւնը յայտնեց սոյն զարգացումնով եւ գնահատեց բարեզարդման աշխատութեանց հսկողներն եւ բարերարները։ Ուստի, 16 Նոյեմբեր, Հինգշաբթի առաւօտ, Տեղապահ Սրբազան Հօր նախագահութեամբ տեղի պիտի ունենայ պաշտամունքի վերաբացման արարողութիւն, որմէ յետոյ պիտի մատուցուի Ս. Պատարագ։