ՄԱՀ ԱՐԱ ԿԻՒԼԷՐԻ

Kategori: Աշխարհական,Եկեղեցական,Համայնքային

Խոր ցաւով վերահասու եղանք համայնքիս անուրանալի արժէքներէն, լուսանկարի աշխարհահռչակ վարպետ Արա Կիւլէրի մահուան բօթին։

Ան մէկ դարու իր կեանքի ընթացքին եղաւ իսկական գագաթնակէտ մը մամլոյ լուսանկարչութեան եւ ստեղծագործ լուսանկարչութեան բնագաւառներուն մէջ՝ ծանօթ ողջ աշխարհի։

Իր անունը հպարտութեամբ պահեց եւ անով ծանօթ եղաւ ամենուրէք։ Գնահատուեցաւ զանազան իշխանութիւններու եւ հաստատութիւններու կողմէ։ Ն.Ա.Տ. Մեսրոպ Բ. Պատրիարք Հայրը 27 Մարտ 2000 թուականին Պատրիարքական Աթոռոյ Պատուոյ շքանշանով եւ օրհնութեան կոնդակով պարգեւատրած էր զինք։ Ապա, ՀՀ Սփիւռքի Նախարարութիւնը Ստանպուլի մէջ 8 Մայիս 2011 թուականին պարգեւատրեց զինք Առշիլ Կոռքի շքանշանով։ 25 Յունուար 2013 թուականին իրեն յանձնուեցաւ ՀՀ Մշակոյթի Նախարարութեան ոսկեայ շքանշանը։

Ան չեղաւ փառքի մարդը եւ նախընտրեց մնալ միշտ համեստ, ժողովրդական ու լաւագոյնս արժեւորեց իր ժամանակը օգտագործելով ունեցած տիրատուր շնորհքները։

Այսօր ան այլեւս կը բացակայի ֆիզիքապէս, սակայն եւ այնպէս իր անունն ու յիշատակը կը մնայ շնորհիւ իր անզուգական արուեստին։

Նկատի ունենալով հանգուցեալին վաստակն ու արժէքը, Պատրիարքական Ընդհանուր Փոխանորդ Բարձր. Տ. Արամ Արքեպս. Աթէշեան տնօրինած է, որ «Համայնքային» յուղարկաւորութեան արարողութիւնը կատարուի ըստ արժանւոյն, յառաջիկայ Շաբաթ, 20 Հոկտեմբեր 2018, ժամը 12.00-ին, Պէյօղլուի Ս. Երրորդութիւն Եկեղեցւոյ մէջ։

Այս առթիւ Աթոռս կու գայ իր շնորհակալութիւնը յայտնել Թուրքիոյ Հանրապետութեան Վսեմաշուք Նախագահ՝ Ռէճէփ Թայյիպ Էրտօղանի ու Ազգային Մեծ Ժողովոյ Մեծայարգ Նախագահ Պինալի Եըլտըրըմի, որոնք հրապարակած են ցաւակցական գիրեր։

Կ՚աղօթենք առ Բարձրեալն Աստուած, որ ընդունի իր մեծավաստակ ծառային ու հայորդւոյն հոգին Երկնային օթեւաններուն մէջ։

Իր կենսագրութեան համար տե՛ս՝ http://www.araguler.com.tr/tr/aboutaraguler.html