ՄՐՑԱՆԱԿԱԲԱՇԽՈՒԹԻՒՆ ՊԱՏՐԻԱՐՔԱՐԱՆԻ ՄԷՋ

Kategori: Համայնքային

odul toreni 1Պատրիարքական Աթոռոյ նախաձեռնութեամբ, 11 Յունիս 2014, Չորեքշաբթի, ժամը 18.00-ին, Պատրիարքարանի դահլիճին մէջ հիւրասիրուեցան համայնքային վարժարաններու աւարտական դասարաններու կրօնագիտութեան դասի յաջողագոյն աշակերտները, իրենց ծնողները, ուսուցիչներն ու տնօրէնները։

Պատրիարքական Ընդհանուր Փոխանորդ Բարձր. Տ. Արամ Ս. Արքեպս. Աթէշեանի առընթեր ներկայ էին Գերշ. Տ. Սահակ Եպս. Մաշալեան, Գերպ. Տ. Զաքէոս Ծ. Վրդ. Օհանեան, Գերպ. Տ. Թաթուլ Ծ. Վրդ. Անուշեան, Հոգշ. Տ. Զատիկ Աբղ. Պապիկեան եւ Արժ. Տ. Գրիգոր Աւ. Քհնյ. Տամատեան։

Պատրիարքական Ընդհանուր Փոխանորդ Սրբազան Հայրը բարի գալստեան խօսքով հանդէս եկաւ եւ ըսաւ թէ՝ այլեւս աւանդական դարձած այս հանդիսութիւնը գեղեցիկ առիթ մըն է համայնքի հոգեւոր կեդրոնի երդիքին տակ մէկտեղուելու համար։ Սրբազան Հայրը անդրադարձաւ աշակերտներու ներկայութեան եւ ըսաւ. «Ձեզմէ ոմանք հաւանաբար առաջին անգամ է որ ներկայ կը գտնուին այս յարկին տակ։ Այս գեղեցիկ աւանդութեամբ, այսօր ձեզի առիթ կը ստեղծուի, որպէսզի մօտէն տեսնէք Պատրիարքարանը։ Կ՚ուզեմ շեշտել թէ Պատրիարքարանը ձեր տունն է եւ դռները ձեզի համար միշտ բաց։ Կը մաղթեմ որ այլ առիթներով, ապագային եւս կը վայելենք ձեր ներկայութիւնը այս յարկէն ներս»։

Նորին Սրբազնութիւնը, աւելի վերջ աշակերտները խրատեց, որպէսզի իրենց կրօնագիտութեան այս յաջողութիւնը յարատեւ ըլլայ եւ կեանքի վերածեն իրենց սորվածները։ Կրօնքի դասի մէջ յաջողութիւնը հարկաւ թէ կարեւոր էր եւ գնահատանքի արժանի, սակայն աւելի կարեւոր էր կրօնական գիտելիքները կեանքի կոչել։ Կրօնական բոլոր գիտելիքները եւ Պատրիարաքական Աթոռոյ մրցանակը ա՛յն ատեն իմաստալից պիտի ըլլային, երբ սոյն գիտելիքները կը շաղախուէին իրենց մտածումներուն եւ գործունէութեանց հետ։

Նորին Սրբազնութիւնը անդրադարձաւ նաեւ համայնքային վարժարաններու մէջ պաշտօն ստանձնած հոգեւորականներուն, որոնք կրօնագիտութիւն կը դասաւանդէին։ Ներկայ ուսումնական շրջանին, համայնքային այլեւայլ վարժարաններու մէջ, Գերշ. Տ. Սահակ Եպս., Գերպ. Տ. Զաքէոս Ծ. Վրդ. եւ Գերպ. Տ. Թաթուլ Ծ. Վրդ. պաշտօն ստանձնած էին։ Այս առթիւ, Նորին Սրբազնութիւնը, իր գնահատանքը յայտնեց վարժարաններու կրթական մշակներուն, որոնք իրենց աշակերտներուն կը փոխանցէին մեր հաւատքի արժէքները։ Նաեւ շնորհակալութիւն յայտնեց բոլոր անոնց, որոնք աշխատած էին այս հանդիսութեան կազմակերպութեան։

Ապա կատարուեցաւ մրցանակաբաշխութիւն, նախ նախակրթարանի, ապա լիսէներու շրջանաւարտներուն, ըստ հետեւեալի.

  • Անարատ Յղութիւն Վարժարան՝ Գարին Տէմիր,
  • Արամեան Ունճեան Վարժարան՝ Գարէն Թէլճիեան,
  • Գալֆայեան Վարժարան՝ Սարօ Օքսար, Սերենա Մէրտէնեան, Արեւ Ապանալեան,
  • Գարակէօզեան Վարժարան՝ Լինտա Չարըքլըեան, Մելիս Եիրմի,
  • Եշիլգիւղի Վարժարան՝ Նորա Պաղամ, Թամար Տուրասլան, Ժասմին Ատէմ,
  • Էսաեան Վարժարան՝ Մելանի Ագայ, Յարութիւն Չիքտէմ (Լիսէ), Թալին Տէմիրճեան (Լիսէ), Էրքան Կարապետեան (Լիսէ), Գարին Տաղ (Լիսէ),
  • Լեւոն Վարդուհեան Վարժարան՝ Մելիս Թաշտէմիր, Լարիսսա Եըլմազ,
  • Մէրամէթճեան Վարժարան՝ Տայք Արէս Միսիսօղլու, Լարիսսա Պետոյեան,
  • Վիեննական Մխիթարեան Վարժարան՝ Աքսէլ Ագմէրճան, Քամի Սահակեան (Լիսէ), Քրիստին Մենուշեան (Լիսէ), Միշէլ Սամուրքաշ (Լիսէ), Թալին Չէլիք (Լիսէ),
  • Վենետիկեան Մխիթարեան Վարժարան՝ էլիզա գարափընար, Այգի չիմինեան,
  • Պէզճեան Մայր Վարժարան՝ Ռաֆֆի Տէղիրմէնճի, Նէլլի Պօլաք,
  • Սահակեան Նունեան Վարժարան՝ Նաթալի Ավճու, Գարին Հիւնտիւր, Ատրինէ Էօզտէմիր (Լիսէ), Մելիսա Չամ (Լիսէ), Քէթրին Զէքի (Լիսէ), Մարիամ Քէշիշօղլու (Լիսէ),
  • Տատեան Վարժարան՝ Արտէն Արսլան, Սեւան Էօզշիմշէք,
  • Կեդրոնական Վարժարան՝ Լեռնա Թարաքճեան, Կարէն Գարապուրուն,  Նորա Էօզտէր,
  • Սուրբ Խաչ Դպրեվանք Վարժարանէն՝ Անիթա Կէզ, Տէմէթ Պաքըրճըօղլու

Օրհնութեան գրերու հետ աշակերտներուն յանձնուեցան սեղանի խաչեր, Սուրբ Գիրքեր եւ Պատրիարքարանի հրատարակած գիրքեր։

Ապա ներկաներ հիւրասիրուեցան կոկիկ սեղաններու շուրջ։

odul toreni 2

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 18