ՆԵՐՔԻՆ ԳՈՐԾՈՑ ՆԱԽԱՐԱՐԷՆ ՀԵՌԱՁԱՅՆ

Kategori: Աշխարհական,Կարճ լուրեր,Համայնքային

Վերջերս, Սամաթիա բնակող կարգ մը տարեց հայ կիներ պարբերաբար յարձակումի ենթարկուած էին։  Ոստիկանութիւնը, յետ կատարուած լուրջ քննարկումներու, ֆաթիհ թաղամասի մէջ ձերբակալած էր Մուրատ Նազարեան անուն անձը որպէս յանձագործ։

Այս հարցին կապակցութեամբ, Ներքին Գործոց Նախարար Մուամմէր Կիւլէր, 5 Մարտ 2013, Երեքշաբթի օր,  հեռաձայնով կապ հաստատեց Պատրիարքական Ընդհանուր Փոխանորդ Բարձր. Տ. Արամ Ս. Արքեպս. Աթէշեանի հետ եւ իր ուրախութիւնը յայտնեց թէ՝ յանձագործը ձերբակալուած էր։ Մեծայարգ նախարարը «անցեալ ըլլայ» ըսաւ եւ յայտնեց թէ
Ապահովութեան պաշտօնեաներ իրենց պաշտօնին գիտակցութեամբ միշտ աջալուրջ կը հսկեն ապահովելու համար անխտիր բոլոր հայրենակիցներու կեանքի եւ ինչքի ապահովութիւնը։ Նաեւ յանձին Նորին Սրբազնութեան իր բարեմաղթութիւնները յղեց Հայ համայնքին։

Նորին Սրբազնութիւնը, յարձակում կրած անձերու, իրենց ընտանիքներուն, ինչպէս նաեւ Հայ համայնքին անունով, շնորհակալութիւն յայտնեց մեծայարգ նախարարին իր ցուցաբերած զգայնութեան եւ յայտնած ազնիւ զգացումներուն համար եւ յաջողութիւն մաղթեց իր գործունէութեանց մէջ։