ՊԱՏՐԻԱՐՔ ՀԱՅՐԸ ԱՆՏԻՈՔԻ ՊԱՇՏՕՆԱԿԱՆ ՇՓՈՒՄՆԵՐԷ ԵՏՔ ԱԹՈՌ ՎԵՐԱԴԱՐՁԱՒ

Kategori: Եկեղեցական,Կարճ լուրեր

Մարտի 7¬ին, Ն.Ա.Տ. Մեսրոպ Ս. Պատրիարք Հայրը, հետն ունենալով Աղեքսանդրեկի Սրբոց Քառասնից Մանկանց Եկեղեցւոյ ծխական խորհուրդի ատենապետ` Կարպիս Քըսատուրը, Քըրըքխանի Սուրբ Գրիգոր Լուսաւորիչ Եկեղեցւոյ ծխական խորհուրդի ատենապետ` Կարպիս Քափլանը, Վաքը‎‎ֆգիւղի Ս. Աստուածածին Եկեղեցւոյ ծխական խորհուրդի ատենապետ` Յակոբ Կէօքջէեանն ու Վաքը‎‎ֆգիւղի Համագործակցական Միութեան ատենապետ` Միհրան Քըսատուրի պաշտօնական այցելութիւններ տուաւ Հաթայի նահանգապետ` Ապտիւլքատիր Սարըի, Անտիոքի քաղաքապետ` Մէհմէտ Ելօղլուի, Անտիոքի Ս. Պետրոս ¬ Ս. Պօղոս Արաբ Ուղղափառ Եկեղեցւոյ հոգեւորականութեան ու ծխական խորհուրդին եւ վերջապէս Ս. Պետրոս Լատին Կաթոլիկ Եկեղեցւոյ Ֆրանչիսկեան հայրերուն։

Նորին Ամենապատուութիւնը ժամը 16.00¬ին հասաւ Ատանա եւ տեղւոյն երեւելի հայերէն Էսաեանցի բարձր ճարտարապետ` Լեւոն Էրասլանի բնակարանը այցելեց, ուր հաւաքուած էր Ատանացի հայ համայնքէն խումբ մը։ Սարքուեցաւ պահքի սեղան, որուն շուրջ Նորին Ամենապատուութիւնը զրուցեց տեղւոյն հայերուն հետ։

Պատրիարք Հայրը Ատանայէն թռիչք առնող ժամը 19.15¬ի սաւառնակով վերադարձաւ իր Աթոռը։