ՊԱՔԸՐԳԻՒՂԻ ԾՆՈՒՆԴ Ս. ԱՍՏՈՒԱԾԱԾՆԻ ԵԿԵՂԵՑՒՈՅ ԹԱՂԱՅԻՆ ԽՈՐՀՈՒՐԴԻ ԱՅՑԸ

Kategori: Համայնքային

IMG_3192Պատրիարքական Տեղապահ Բարձր. Տ. Գարեգին Արքեպս. Պէքճեան, 12 Հոկտեմբեր 2017, Հինգշաբթի, Պատրիարքարանի մէջ ընդունեց Պաքըրգիւղի Ծնունդ Ս. Աստուածածնի Եկեղեցւոյ Թաղային Խորհուրդի ներկայացուցիչները, գլխաւորութեամբ եկեղեցւոյ երէց՝ Արժ. Տ. Տրդատ Քհնյ. Ուզունեանի։

Այցելուներ, շնորհաւորեցին Տեղապահ Սրբազանը եւ յաջողութիւն մաղթեցին իր պաշտօնին մէջ։ Եկեղեցւոյ եւ վարժարանի մասին տեղեկութիւններ փոխանցելէ յետոյ, յայտնեցին, որ Պաքըրգիւղի Եկեղեցւոյ տարեկան տօնախմբութիւնը այս տարի պիտի կատարուէր 5 Նոյեմբեր 2017, Կիրակի առաւօտ, ապա պիտի սարքուէր սիրոյ սեղան ի նպաստ Պաքըրգիւղի Եկեղեցւոյ եւ Տատեան Վարժարանին։ Կատարելի հանդիսութեանց համար Պատրիարքական Աթոռոյ հովանաւորութիւնը եւ Պատրիարքական Տեղապահ Սրբազան Հօր օրհնութիւնը խնդրեցին։ Թաղի համայնքային կեանքի մասին հիմնական տեղեկութիւնները փոխանցուեցաւ նաեւ Նորին Սրբազնութեան։

Տեղապահ Սրբազան Հայրը, իր ուրախութիւնը յայտնեց տրուած քաղաքավարական այցելութեան համար։ Լսելով թաղի ծրագիրներուն եւ նեղութիւններուն մասին, իր հայրական խրատները ուղղեց այցելուներուն։ Վստահութիւն յայտնեց թէ՝ համատեղ աշխատութեամբ աւելի պիտի դիւրանային համայնքային կեանքին հետ առընչուած խնդիրներու լուծումը։ Այնուհետեւ, կարողութիւն եւ յաջողութիւն մաղթեց այցելուներուն, իրենց գործունէութեանց մէջ։