Ս. ԽԱՉ ԴՊՐԵՎԱՆՔԻ ՎԱՐԻՉՆԵՐԸ ՊԱՏՐԻԱՐՔԱՐԱՆԻ ՄԷՋ

Kategori: Համայնքային

IMG_3189Պատրիարքական Տեղապահ Բարձր. Տ. Գարեգին Արքեպս. Պէքճեան, 12 Հոկտեմբեր 2017, Հինգշաբթի, Պատրիարքարանի մէջ ընդունեց Ս. Խաչ Դպրեվանքի Խնամակալութեան անդամները, գլխաւորութեամբ վարչութեան Փոխ-Ատենապետ՝ Մինաս Քօրթունի եւ վարժարանի հիմնադրի ներկայացուցիչ՝ Վարուժան Պուլկանի։

Այցելուներ, շնորհաւորեցին Տեղապահ Սրբազանը եւ յաջողութիւն մաղթեցին իր պաշտօնին մէջ։ Իրենց ուրախութիւնը յայտնեցին, ըսելով թէ՝ Ս. Խաչ Դպրեվանքէ շրջանաւարտ բարձրաստիճան հոգեւորական մը, ներկայիս ստանձնած էր վարչական ծանր պատասխանատուութիւն մը։ Սրբազան Հօր ներկայութիւնը առիթ համարելով, վարչութեան անդամները քաղաքավարական այցելութեամբ եկած էին վարժարանի մասին տեղեկութիւններ փոխանցելու։ Մտերմիկ զրոյցի ընթացքին, Սրբազան Հօր ներկայացուեցաւ վերջին տարիներուն վարժարանէ ներս արձանագրուած զարգացումները։ Սրբազան Հայրը, իր ուրախութիւնը յայտնեց տեսնելով վարժարանի երիտասարդ ուժերը, որոնք վարչութեան ղեկը ստանձնած էին իրենց պատասխանատոուութեան գիտակցութեամբ։ Ստանպուլէ հեռու ըլլալով հանդերձ, ան տարբեր առիթներով կը հետեւէր Ս. Խաչ Դպրեվանք Վարժարանի գործունէութեանց։ Սրբազան Հայրը, առիթէն օգտուելով յայտնեց նաեւ իր մտածումները եւ փոխանցեց հայրական յորդորները։ Յիշեցուց թէ՝ վարժարանը աւանդն էր Գարեգին Պատրիարք Խաչատուրեանի եւ ներկայ սերունդը եւս նոյն գիտակցութեամբ պարտէր շարունակել իր Դպրեվանեցիի կոչումը։ Հանդիպման ընդացքին, այցելուներ, որպէս համայնքի անդամ անրդադարձան նաեւ, համայնքային խնդիրներուն, ի մասնաւորի Պատրիարքական Ընտրութեանց։ Յայտնեցին թէ՝ Սրբազան Հայրը, իր փորձառութեամբ առաւել եւս ներդրում պիտի ունենար Պատրիարքական ընտրութեանց գործընթացքի բարելաւման։ Այս ուղղութեամբ շատեր, վստահութիւն ունէին թէ՝ Սրբազան Հօր խաղաղ բնաւորութիւնը, իր դրական անդրադարձը պիտի ունենար սոյն գործընթացին վրայ։ Սրբազան Հայրը, յայտնեց թէ առկայ հարցերու լուծումը կը կարօտի երկխօսութեան։

Հանդիպման ընթացքին, Սրբազան Հայրը ուրախութինւը յայտնեց քաղաքավարական այցելութեան առիթով։ Ինք, միշտ կ՚ուրախանար համայնքային կրթական հաստատութեանց մասին բարի լուրեր լսելով։ Տեղապահ Սրբազան Հայրը, գնահատեց վարժարանի վարիչները եւ յաջողութիւն մաղթեց իրենց գործունէութեանց մէջ։ Այս առթիւ, կը հաղորդուի նաեւ թէ Շաբաթ առաւօտ, Տեղապահ Սրբազան Հօր նախագահութեամբ, Ս. Թարգմանչաց Տօնի առթիւ, Սկիւտարի Ս. Խաչ Եկեղեցւոյ մէջ պիտի նշուի նաեւ Ս. Խաչ Դպրեվանքի օրհնութեան օրը եւ հանգստեան աղօթքով պիտի յիշատակուի՝ վարժարանի վախճանեալ հիմնադիր՝ Գարեգին Պատրիարք Խաչատուրեանը։