ՕՐԹԱԳԻՒՂԻ Ս. ԱՍՏՈՒԱԾԱԾԻՆ ԵԿԵՂԵՑԻՆ ՊԱՇՏԱՄՈՒՆՔԻ ՎԵՐԱԲԱՑՈՒԵՑԱՒ

Kategori: Եկեղեցական,Կրօնական,Համայնքային
165557268_1808977689262106_7430257383607669086_nՕրթագիւղի Ս. Աստուածածին Եկեղեցին, որ բարեզարդման աշխատանքներու պատճառաւ պաշտամունքի փակուած էր, 26 Մարտ 2021, Ուրբաթ, ձեռամբ Ն.Ա.Տ. Սահակ Բ. Պատրիարք Հօր պաշտամունքի վերաբացուեցաւ։ Արարողութեան մասնակցեցան Պատրիարքական Աթոռոյս միաբան հայրեր, քահանայից դասու անդամներ, ինչպէս նաեւ եկեղեցւոյ դպիրները։ Արարողութեան ներկայ եղան նաեւ Ատենապետ Իսքէնտէր Շահինկէօզի գլխաւորած Օրթագիւղի Թաղային Խորհուրդի անդամները։ Քորոնա համավարակի սահմանափակումներուն պատճառաւ արարողութիւնը կատարուեցաւ փոքրաթիւ հաւատացեալներու մասնակցութեամբ։
Ժամը 15.00-ին, Նորին Ամենապատուութիւնը, ժամանեց Օրթագիւղ եւ դիմաւորուեցաւ հոգեւորականաց եւ եկեղեցւոյ պատասխանատուներու կողմէ։ Ապա, եկեղեցւոյ մուտքին կատարուեցաւ Դռնբացէքի Արարողութիւն, որմէ յետոյ ներկաներ մուտք գործեցին բարեզարդեալ եկեղեցին։ Արարողութեանց երգեցողութիւնները կատարուեցաւ ներկայ հոգեւորականներու եւ դպիրներու կողմէ, առաջնորդութեամբ՝ Արժ. Տ. Տրդատ Աւ. Քհնյ. Ուզունեանի։ Արտասանուած նաւակատիքի արարողութեան աղօթքներէն յետոյ, Նորին Ամենապատուութիւնը Սրբալոյս Միւռոնով օծեց Ս. Աստուածածին Եկեղեցւոյ աւագ խորանն ու պահարաններու Ս. Սեղանները։ Օծման արարողութենէն յետոյ, Նորին Ամենապատուութեան նախագահութեամբ տեղի ունեցաւ երեկոյեան ժամերգութիւն։165198824_1808977562595452_5620862246219191698_n
Արարողութեան աւարտին Պատրիարք Հայրը քարոզեց եւ ուրախութիւն յայտնեց եկեղեցւոյ մէջ կատարուած բարեզարդման աշխատանքներու կապակցութեամբ։ Պատրիարք Հայրը տաճարի կարեւորութիւնը շեշտադրեց եւ Ս. Գրային օրինակով ցոյց տուաւ թէ՝ Յիսուս, տաճարը բնութագրած էր, որպէս Իր տունը։ Այս առումով եկեղեցիները մաքուր եւ ներկայանալի պահելը, բոլորիս վերապահուած պարտականութիւն մըն է։ Առ այդ, եկեղեցւոյ համար եղած ծախսերը Աստուծոյ համար եղած կ՚ընկալուին եւ երբեք չեն նկտուիր որպէս յաւելեալ ծախս։
Մեր Հոգեւոր Պետը, ապա յայտնեց թէ Հայ Ժողովուրդի ամենէն նշանաւոր յատկութիւններէն է իր արուեստով շաղախուած տաճարներ կերտել։ Այս առումով, մեր եկեղեցիներուն մէջ տեսանելի կը դառնայ նաեւ արուեստի նրբութիւնը։ Օրինակ, Հայեր, Խաչքարերով տաճար կերտելու սովորութիւնը ունեցած են, բան մը որ կրօնքն ու մշակոյթը իրարու կը շաղախէ։ Պատրիարք Հայրը գովեց եկեղեցւոյ երէց՝ Արժ. Տ. Զաւէն Քհնյ. Պչաքճեանի գործունէութիւնը եւ իր անձին մէջ գնահատեց եկեղեցւոյ դպրաց ծառայութիւնը։ Մեր Հոգեւոր Պետը ապա վեր առաւ Օրթագիւղի Թաղային Խորհուրդի գործունէութիւնը եւ յայտնեց թէ անոնք իրենց յարակից մարմիններով լաւապէս կը հսկեն Օրթագիւղի Ս. Աստուածածին Եկեղեցւոյ եւ Թարգմանչաց Վարժարանին։
Իր խօսքերու աւարտին, Պատրիարք Հայրը յայտնեց թէ՝ Աւագ Շաբթուան սեմին եկեղեցին կը վերաբացուէր եւ յատկապէս այս շաբթուան ընթացքին բարեզարդուած եկեղեցւոյ կամարներուն տակ առաւել եւս լսելի պիտի դառնային աղօթը, շարականը եւ փառաբանութիւնը։
Արարողութիւնը, իր աւարտին հասաւ, միասնաբար արտասանուած Տէրունական Աղօթքով եւ վերջին օրհնութեամբ։
  • 165557268_1808977689262106_7430257383607669086_n
  • 165153960_1808977309262144_1142022164875024287_n
  • 165389509_1808977165928825_6392926809655737634_n
  • 165198824_1808977562595452_5620862246219191698_n
  • 165783971_1808977272595481_17002780999792708_n
  • 165528943_1808976922595516_4723780786591152476_n