Պատրիարքական Տեղապահ Բարձր. Տ. Գարեգին Արքեպս. Պէքճեան, ընկերակցութեամբ՝ Պատկառելի Կրօնական Ժողովոյ Ատենապետ Գերշ. Տ. Սահակ Եպս. Մաշալեանի, Հոգշ. Տ. Յարութիւն Աբղ. Տամատեանի եւ Արժ. Տ. Գրիգոր Աւ. Քհնյ. Տամատեանի, 9 Հոկտեմբեր 2017, Հինգշաբթի, ժամը 12.00-ին այցելութիւն տուաւ Յունաց Պատրիարքարան եւ ընդունուեցաւ Յունաց Ն.Ս.Տ.Տ. Բարթոլոմէոս Ա. Ծայրագոյն Պատրիարքի կողմէ։

Սրբազան Հայրը, յայտնեց թէ որպէս Տեղապահ, փափաքած էր քաղաքավարական այցելութեամբ անձամբ ծանօթանալ Յունաց Ծայրագոյն Պատրիարքին հետ։ Ինք անդրադարձաւ Գերմանիոյ Առաջնորդութեան շրջանին տեղւոյն Յունաց Առաջնորդին հետ ունեցած լաւ յարաբերութիւնները միջեկեղեցական յարաբերութեանց գծով։ Նորին Սրբազնութիւնը յիշեցուց թէ՝ անցեալին Գերմանիոյ եւ Մայր Աթոռ Ս. Էջմիածնի մէջ, բարձրորակ միջեկեղեցական արարողութեանց ծիրէն ներս իրարու հետ տեսակցելու առիթը ունեցած էին, Պոլսեցի բարձրաստիճան հոգեւորական ըլլալու հանգամանքով։ Այս այցելութիւնը առիթ մըն էր, անգամ մը եւս հանդիպիլ Պոլսոյ մէջ։ Բարթոլոմէոս Պատրիարք, յիշեց Հանգստեան Կոչուած Մեսրոպ Պատրիարքի հետ ունեցած եղբայրական յարաբերութիւնը եւ ցաւ յայտնեց, քանի հիւանդութեան հետեւանքով չէր կրնար գործել Նորին Ամենապատուութիւնը։ Յայտնեց թէ, տարբեր առիթներով կ՚այցելէր Ազգային Հիւանդանոց տեսնելու համար իր հոգեւոր եղբայրը։ Յիշեցուց թէ ինք երկար ժամանակէ ի վեր կը պաշտօնավարէ, որպէս Յունաց Ծայրագոյն Պատրիարք ու շեշտեց թէ երկար տարիներէ ի վեր Հայ եւ Յոյն եկեղեցիներ, որպէս քոյր եկեղեցիներ սերտ յարաբերութիւն ունին մանաւանդ Պոլսոյ մէջ։ Նորին Սրբութիւնը յայտնեց թէ ինք կը հետեւի Հայ Համայնքը հետաքրքրող լուրերով։ Իր ուրախութիւնը յայտնեց տրուած այցելութեան համար ու շնորհաւորեց Տեղապահ Սրբազան Հայրը իր ստանձնած պատասխանատու պաշտօնին առթիւ։