Տեղապահ Սրբազան Հօր Օրհնութեան Գիրը ընթերեց՝ Արժ. Տ. Տրդատ Քհնյ. Ուզունեան։ Սրբազան Հօր խօսքին մէջ ի միջի այլոց կ՚ըսուէր. «Ս. Փրկիչ Ազգային Հիւանդանոցը մեր ժողովուրդին ծանօթ այս բարենպատակ առաքելութեան առընթեր, վերջերս ունեցած է այլ բարեգործական ներդրում մը, որ անծանօթ մնացած է մեր համայնքին եւ կամ քիչերու ծանօթ։ Դժբախտ դէպքերու հետեւանքով Իրաքահայ եւ Սուրիահայ գաղթականներ ապաստան գտած ըլլալով, կը բնակին Թուրքիոյ զանազան նահանգներու մէջ, անձուկ պայմաններու ներքեւ շարունակելով ապրիլ իրենց առօրեայ կեանքերը։ Անոնք կը կարօտէին ու տակաւին ալ կը կարօտին մեր ժողովուրդի օժանդակութեան։ Անոնք անորոշ ժամանակաւ հարկադրուած են բնակիլ մեր երկրին մէջ։ Այս գաղթական ընտանիքներուն օժանդակելու, իրենց հոգեւոր կարիքները հոգալու առաքելութեամբ Պատրիարքական Աթոռի հովանաւորութեամբ կազմուած է յանձնախումբ մը, որուն անդամները իրենց կարելին ի գործ կը դնեն զանազան առիթներով իրենց այցելելով։ Հոգեւոր ուրախութեամբ կ՚անդրադառնանք թէ, Տիար Պետրոս Շիրինօղլուի ատենապետած Ս. Փրկիչ Ազգային Հիւանդանոցի Պատուարժան Հոգաբարձութիւնը իր վրայ առած է սոյն գաղթականներու օժանդակելու քաղցր լուծի մեծագոյն բաժինը, շարժման անցնելով Ազգային Հիւանդանոցի նիւթական միջոցները»։

Գրութեան ընթերցումէն յետոյ, Տեղապահ Սրբազանը Պետրոս Շիրինօղլուի անձին մէջ շնորհաւորեց Ս. Փրկիչ Ազգ. Հիւանդանոցի Հոգաբարձութիւնը ու ատենապետին յանձնեց Օրհնութեան Գիրը։ Այս առթիւ, հակիրճ ելոյթ մը ունեցաւ Պետրոս Շինինօղլուն ու շնորհակալութիւն յայտնեց Տեղապահ Սրբազան Հօր։