Ինչպէս նախորդ լուրով հաղորդած էինք, Մեծի Տանն Կիլիկիոյ Կաթողիկոսութեան Դպրեվանքի սաները 14 Ապրիլ 2016, Հինգշաբթի առաւօտ հասան քաղաքս եւ այցելեցին Պատրիարքարան։

http://www.turkiyeermenileripatrikligi.org/site/hy/%D5%A1%D6%80%D5%B4%D5%A1%D5%B7-%D5%A5%D6%80%D5%A3%D5%B9%D5%A1%D5%AD%D5%B8%D6%82%D5%B4%D5%A2%D5%AB-%D5%A1%D5%B6%D5%A4%D5%A1%D5%B4%D5%B6%D5%A5%D6%80%D5%A8-%D5%A8%D5%B6%D5%A4%D5%B8%D6%82%D5%B6%D5%B8/

Անոնք ապա, առաջնորդութեամբ Գերպ. Տ. Թաթուլ Ծ. Վրդ. Անուշեանի, այցելեցին Սամաթիոյ Ս. Գէորգ Եկեղեցին, որ նախկին Աթոռանիստն էր քաղաքիս։ Հիւրերը դիմաւորուեցան տեղւոյն հոգեւոր հովիւ՝ Գերպ. Տ. Զաքէոս Ծ. Վրդ. Օհանեանի, տեղւոյն թաղային խորհուրդի ներկայացուցիչներուն, Սահակեան-Նունեան Վարժարանի զոյգ տնօրէններու եւ այլոց կողմէ։ Նախ մտան Ս. Գէորգ Եկեղեցի, ուր կատարեցին իրենց ուխտի աղօթքը, տեղեկութիւններ ստացան եկեղեցւոյ մասին, ապա միութեան սրահին մէջ դիտեցին Սահակեան Նունեան Լիկէոնի յիսնամեակին համար պատրաստուած տեսաերիզը։

Հիւրերը, Հրաչեայ Աճառեանի անուան սրահին մէջ համախմբուեցան սարքուած սիրոյ սեղաններուն շուրջ։

Անոնք ապա այցելեցին Պալըքլըի Ազգային Գերեզմանատունը, ուր դիմաւորուեցան տնօրէն Ալէն Քէչէճեանի կողմէ։ Տեսան Երանաշնորհ Շնորհք Պատրիարքի նորակերտ արձանը, այցելեցին Մեծի Տանն Կիլիկիոյ Աթոռոյ նախկին գահակալներէն Երանաշնորհ Թորոս Կաթողիկոսի շիրիմը, Եոզղատի Առաջնորդ եւ Կիլիկիոյ Կաթողիկոսական Փոխանորդ Ղեւոնդ Ծ. Վրդ. Թուր Սարգիսեանի, Միսաք Մեծարենցի, Տքթ. Զաքար Թարվէրի, Հրանտ Տինքի շիրիմները, ինչպէս նաեւ նահատակաց յուշարձանը։ Անոնք հանգստեան աղօթքներ մատուցին հանգուցեալներու հոգւոյն։

Այցելուները ապա մեկնեցան Ս. Փրկիչ Ազգային Հիւանդանոց, ուր ընդունուեցան Հոգաբարձութեան Ատենապետ Պետրոս Շիրինօղլուի եւ այլ պատասխանատուներու կողմէ։ Շրջեցան տեղւոյն թանգարանը, իսկ հայր սուրբեր այցելեցին Ն.Ա.Տ. Մեսրոպ Բ. Պատրիարքը, աղօթեցին իրեն համար եւ զօրակցութիւն յայտնեցին Տիրամայր Մարի Մութաֆեանին։

Մեծի Տանն Կիլիկիոյ Կաթողիկոսութեան միաբաններն ու Դպրեվանքի սաները, 15 Ապրիլ 2016, Ուրբաթ առաւօտ մեկնեցան Գնալը Կղզի, ուր այցելեցին Ս. Գրիգոր Լուսաւորիչ Եկեղեցին, տեսան Պատրիարքական ամառանոցը, Կազդուրման Կայանը։ Անոնք եկեղեցւոյ մէջ տեղեկութիւններ ստացան Կղզեաց եւ յատկապէս Գնալըի պատմութեան մասին, աղօթեցին, ապա հիւրասիրուեցան կէսօրուան ճաշով։

Կղզիէ վերադարձին, այցելուներ առաջնորդուեցան Այիա Սօֆիա երբեմնի Տաճար – այժմու թանգարանը, ուր մի առ մի շրջեցան վերնատունն ու ատեանը, խճանկարները եւ այլ մասերը։ Ապա մեկնելով թանգարանէն, յետիոտն այցելեցին Սուլթանահմէտի հրապարակը, Փակ Շուկան եւ պատմական քաղաքի զանազան մասերը։

Մեծի Տանն Կիլիկիոյ Կաթողիկոսութեան միաբաններն ու Դպրեվանքի սաները, 16 Ապրիլ 2016, Շաբաթ առաւօտ մեկնեցան Ղալաթիա, ուր Ս. Գրիգոր Լուսաւորիչ Եկեղեցւոյ մուտքին դիմաւորուեցան Խնամակալութեան ատենապետ Յարութիւն Էպէօղլուի եւ ներկայացուցիչներու կողմէ։ Անոնք տեղեկութիւն ստացան Եկեղեցւոյ ու համալիրի մասին։ Այս եկեղեցին մասնաւոր նշանակութիւն կը ստանար Լիբանանէն եկած այցելուներուն համար, քանի նոյն եկեղեցւոյ մէջ պաշտօն վարած էր մեծանուն Արմաշական եւ Մեծի Տանն Կիլիկիոյ Կաթողիկոսութեան երանաշնորհ գահակալներէն Բաբգէն Աթոռակից Կաթողիկոսը։ Անոնք շրջեցան եկեղեցին, այցելեցին Ս. Ամենափրկչի մատուռը, Երանաշնորհ Յովհաննէս Բաղիշեցի Կոլոտ Պատրիարքի ուխտատեղի դարձած դամբարանը։ Դպրեվանեցիներ այստեղ շարականով ու աղօթքով յիշատակեցին Պատրիարքական Աթոռոյ մեծանուն այս գահակալը։ Ապա անոնք հիւրասիրուեցան եկեղեցւոյ սրահին մէջ սարքուած թէյասեղաններու շուրջ։

Դպրեվանեցիներ ապա առաջնորդուեցան Շիշլիի Ազգային Գերեզմանատունը, ուր դիմաւորուեցան վարչութեան անդամներու կողմէ։ Ուղղուեցան կուսակրօն եկեղեցականներու թաղը, որու ճամբուն այցելեցին Երանաշնորհ Մաղաքիա Պատրիարք Օրմանեանի նորակերտ արձանը։ Անոնք ծաղկեպսակներ զետեղեցին Մեծի Տանն Կիլիկիոյ Կաթողիկոսութեան Սիսի Դպրեվանքի տեսուչներէն Երանաշնորհ Գարեգին Ա. Պատրիարք Խաչատուրեանի եւ Անթիլիասի Դպրեվանքի տեսուչներէն Երանաշնորհ Շնորհք Պատրիարք Գալուստեանի շիրիմներուն, ապա արտասանեցին հանգստեան աղօթք երկու մեծանուն եկեղեցականներու հոգւոցն։

Անոնք այցելեցին նաեւ Դանիէլ Վարուժանի յուշարձանը, մտաւորականներու եւ արուեստագէտներու պանթէոնը, զանազան կրթական մշակներու եւ մտաւորականներու շիրիմները, հանգստեան աղօթքներ մատուցին հանգուցեալներու հոգւոյն։ Ապա գերեզմանատան սրահին մէջ սիրոյ սեղան սարքուեցաւ ի պատիւ այցելուներու։

Նոյն գիշեր Ս. Աստուածածին Աթոռանիստ Մայր Տաճարի համալիրի Ս. Որդւոց Որոտման Եկեղեցի – Մեսրոպ Բ. Պատրիարքի անուան մշակութային սրահին մէջ սարքուեցաւ յիշատակի ոգեկոչման հանդիսութիւն – համերգ՝ Երանաշնորհ Շնորհք Պատրիարքի վախճանման քսան հինգ ամեակին առթիւ։

http://www.turkiyeermenileripatrikligi.org/site/hy/%D5%B7%D5%B6%D5%B8%D6%80%D5%B0%D6%84-%D5%BA%D5%A1%D5%BF%D6%80%D5%AB%D5%A1%D6%80%D6%84-%D5%BE%D5%A1%D5%AD%D5%B3%D5%A1%D5%B6%D5%B4%D5%A1%D5%B6-25-%D5%A1%D5%B4%D5%A5%D5%A1%D5%AF%D5%AB%D5%B6-%D5%A1%D5%BC/

Քաղաքս այցելութեան վերջին օրը՝ 17 Ապրիլ 2016, Կիրակի առաւօտ, Մեծի Տանն Կիլիկիոյ Կաթողիկոսութեան միաբաններն ու Դպրեվանքի սաները, գլխաւորութեամբ իրենց տեսուչ՝ Հոգշ. Տ. Թորգոմ Վրդ. Տօնոյեանի, մասնակցեցան Ֆէրիգիւղի Ս. Վարդանանց Եկեղեցւոյ կիրակնօրեայ հանդիսութեան։

Ս. Պատարագը մատոյց Գերպ. Տ. Թաթուլ Ծ. Վրդ. Անուշեան, իսկ Ս. Սեղանին սպասարկեցին Դպրեվանքի սաները։ Երգեցողութիւնը կատարուեցաւ Վարդանանց Դպրաց Դաս Երգչախումբի կողմէ, առաջնորդութեամբ Բրշ. Ատրուշան Սրկ. Հալաճեանի եւ երգեհոնահարութեամբ Լուսի Քահվէճիօղլուի։

Ի ժամ Ս. Պատարագի, Հայր Սուրբը քարոզեց, բնաբան ունենալով ՝՝Ան որ իմ խօսքերս կը լսէ եւ կը հաւատայ անոր, որ զիս ղրկեց, յաւիտենական կեանք ունի՝՝ (Յովհաննէս Ե. 24) համարը։ Հայր Սուրբը շեշտը դրաւ յաւիտենական կեանքի տիրանալու համար մեր մղած պայքարին վրայ։

Յաւարտ եկեղեցական հանդիսութեան, տեղւոյն Թաղային Խորհուրդը Ալաճաճեան սրահին մէջ սիրոյ սեղան մը սարքեց ի պատիւ հիւրերուն։ Այստեղ, յանուն Եկեղեցւոյ սրտի խօսքով հանդէս եկաւ տեղւոյն քարոզիչ Գերպ. Տ. Թաթուլ Ծ. Վրդ. Անուշեան եւ շնորհակալութիւն յայտնեց իրենց ներկայութեան եւ աղօթակցութեան համար, յուշանուէրներ յանձնեց միաբան հայրերուն, ինչպէս նաեւ Դպրեվանքի սաներուն։ Գեղեցիկ անակնկալ էր այն նկարը, որ նկարուած էր տարիներ առաջ Լիբանանի Առաջնորդ Գերշ. Տ. Արամ Արքեպս.ի քաղաքս այցելութեան առթիւ։ Ինք ուրիշը չէր, եթէ ոչ Մեծի Տանն Կիլիկիոյ Ն.Ս.Օ.Տ.Տ. Արամ Ա. Հայրապետը։

Իր կարգին սրտի խօսք արտասանեց նաեւ Հոգշ. Տ. Թորգոմ Վրդ. Տօնոյեան, որ ըսաւ թէ Ֆէրիգիւղը հարազատ վայր է իրեն համար եւ այսօրուան հանդիսութեամբ հարազատ կը դառնայ նաեւ այցելու միաբաններուն եւ Դպրեվանեցիներուն համար եւս։ Հայր Սուրբը Վեհափառ Հայրապետին նուէր գրիչը յանձնեց Գերպ. Տ. Թաթուլ Ծ. Վրդ. Անուշեանին, եւ յանուն Դպրեվանքի տեսչութեան՝ յուշանուէրներ յանձնեց Շիշլիի Փոխ-Քաղաքապետ Վազգէն Պարընի, Թաղային Խորհուրդի Ատենապետ Մանուկ Էօղէրի, Ժամանակ օրաթերթի գլխաւոր խմբագիր Արա Գօչունեանի եւ Բրշ. Վաղարշակ Սրկ. Սերովբեանի։

Սիրոյ սեղանը աւարտեցաւ միաբերան արտասանուած աղօթքով։

Հիւրերը ապա յատուկ զբօսանաւով պտոյտ կատարեցին Պոսֆորի վրայ, դիտեցին տեսարժան վայրերն ու պատմական շէնքերը։

Պտոյտի աւարտին, երեկոյեան, հիւրեր Գերպ. Տ. Թաթուլ Ծ. Վրդ. Անուշեանի եւ Բրշ. Վաղարշակ Սրկ. Սերովբեանի կողմէ առաջնորդուեցան Եշիլգիւղի օդակայանը, ուր յետ պաշտօնական գործողութեանց, վերադարձան Պէյրութ։