Ինչպէս ծանօթ է, Յոյն եւ Ասորի եկեղեցիները Ս. Յարութեան Տաղաւարը կը տօնեն ըստ հին տոմարի։ Յուլեան տոմարի Ս. Զատիկը այս տարի կը զուգադիպէր 2 Մայիս, Կիրակիի։ Ըստ աւանդութեան՝ Յոյն Եկեղեցւոյ տաղաւարի արարողութեան իր մասնակցութիւնը կը բերէ նաեւ Հայ Եկեղեցին։
Այս տարի ընդառաջելով Յունաց Պատրիարքական Աթոռի հրաւէրին, միայն Ֆէնէրի Ս. Գէորգ Աթոռանիստ Մայր Տաճարի մէջ կատարուած արարողութեան իր մասնակցութիւնը բերաւ Հայոց Պատրիարքական Աթոռը։ Յանուն Աթոռոյս արարողութեան իրենց մասնակցեցաւ Հոգշ. Տ. Յովակիմ Աբղ. Սերովբեան եւ Բրկ. Արթիւր Ուր. Դպ. Պաղտասարեան։ Յընթացս արարողութեան, զանազան լեզուներով ընթերցուած Ս. Գրային բաժիններու կարքին, Հայր Սուրբը հայերէնով ընթերցեց Աւետարանը։ Այս առթիւ, յանուն Ն.Ա.Տ. Սահակ Բ. Պատրիարք Հօր, Ն.Ս.Տ.Տ. Պարթոլոմէոս Ծայրագոյն Պատրիարքին փոխանցեց նաեւ շնորհաւորաններ եւ բարեմաղթութիւններ։