Նորին Սրբութիւն Բենեդիկտոս ԺԶ. Պապը 18 Օգոստոս 2005, Հինգշաբթի, Համաշխարհային Երիտասարդաց Օրուան մասնակցելու համար Քէօլն ժամանեց եւ օդակայանը դիմաւորուեցաւ Գերմանիոյ Նախագահ՝ Հորսթ Քէօհլէրի եւ տիկնոջ, Վարչապետ՝ Կերհարտ Շրէօտէրի եւ տիկնոջ, եւ Քէօլնի Կարտինալ՝ Եոախիմ Մայսնէրի կողմէ։
Հազարաւոր երիտասարդներ Ռայն գետի ափերուն շարուած կը սպասէին Սրբազան Քահանայապետին եր կէսօրէ ետք յատուկ նաւով պիտի ժամանէր եւ Մայր Տաճարի մերձաւոր ափին ցամաք պիտի ելլէր։
Ժամը 18.30-ի շուրջ, Սրբազան Պապը ժամանեց, իր նաւէն ողջունեց երիտասարդները, ապա ցամաք իջաւ եւ ուխտի այցելութիւն տուաւ Քէօլնի Մայր Տաճարին, ուր աւանդութեան համաձայն կը գտնուին Բեթղեհէմ այցելող արեւելեան երեք իմաստուններու՝ Մելքոն, Գասբար եւ Պաղտասարի մասունքները։