ՍՎԱՍԻ ՄԷՋ Ս. ՅԱՐՈՒԹԵԱՆ ՏՕՆԸ
Ս. Յարութեան Տաղաւարին առթիւ Պատրիարքական Ընդհանուր Փոխանորդ Բարձր. Տ. Արամ Ս. Արքեպս.ի արտօնութեամբ, Աթոռոյս Լուսարարապետ Գերպ. Տ. Թաթուլ Ծ. Վրդ. Անուշեան, ընկերակցութեամբ Արժ. Տ. Գէորգ Աւ. Քհնյ. Չնարեանի եւ Բրկ. Յովսէփ Ուր. Դպ. Գույումճեանի, հովուական այցելութիւն մը տուաւ Սվասի Հայ համայնքին։
Տ. Թաթուլ Ծ. Վրդ. եւ ընկերակիցները 10 Ապրիլ 2018, Երեքշաբթի առաւօտ, օդային ճամբով մեկնեցան Սվաս եւ դիմաւորուեցան տեղւոյն ազգայիններէն՝ Երուանդ Տուրմազկիւլէրի ու Երուանդ Մըղտըսի կողմէ։ Անոնք ուղղուեցան դէպի գերեզմանատուն, ուր ժամը 14.00-ին կատարուեցաւ ընդհանուր հոգեհանգստեան կարգ։ Յիշատակուեցան Սվասի երբեմնի առաջնորդները, հոգեւոր ու ազգային սպասաւորներն ու տեղւոյն հանգուցեալ հաւատացեալները։
Նոյն երեկոյեան Ժամը 21.00-ին Տուրմազկիւլէր ընտանիքի բնակարանին մէջ մատուցուեցաւ առտնին Ս. Պատարագ։ Արարողութեանց աւարտին ներկաներ համախմբուեցան սիրոյ սեղանի շուրջ։ Հայր Սուրբը Պատրիարքական Ընդհանուր Փոխանորդ Սրբազան Հօր ողջոյններն ու օրհնութիւնը փոխանցելէ ետք, քարոզեց եւ շեշտեց վերանորոգութեան կարեւորութիւնը եւ ազգային ու մշակութային արժէքներու կապուած մնալու հրամայականը։ Ան ընդգծեց նաեւ հաղորդութիւն ստանալու եւ Ս. Գրքի ընթերցման կարեւորութիւնը հաւատքի զօրացման համար։
Նոյն գիշեր, այցելութիւն մըլ տրուեցաւ նաեւ Սվասի մեր համայնքի երիցագոյն անդամուհի Տիկին Հերիքնազ Արսլանի։
Յաջորդ օր, ժամը 11.30-ին, Տ. Թաթուլ Ծ. Վրդ. եւ ընկերակիցները քաղաքավարական այցելութիւն մը տուին Սվասի Քաղաքապետ Սամի Այտընի։ Հայր Սուրբը փոխանցեց Պատրիարքական Ընդհանուր Փոխանորդ Սրբազան Հօր ողջոյնները եւ շնորհակալութիւն յայտնեց մերազն ժողովուրդին նկատմամբ ցուցաբերուած մօտիկ հետաքրքրութեան համար։
Աւելի քան մէկ ժամուան հաճելի զրոյցի ընթացքին ինչ ինչ հարցերու մասին կատարուեցան կարծիքի փոխանակումներ։ Այցելուները, շնորհակալութիւն յայտնեցին սոյն հանդիպման համար։ Թաթուլ Ծ. Վրդ. Սվասի Քաղաքապետին նուիրեց Սեբեստացի Ս. Վլաս Հայրապետի մասին գիրք մը, իսկ Քաղաքապետն ալ իր կարգին՝ յուշապնակ մը։
Անոնք նոյն երեկոյեան օդային ճամբով վերադարձան Ստանպուլ։
Այցելութեանց ընթացքին Սեբաստիոյ մերազն համայնքի անդամները մեծապէս ուրախ էին, Ս. Յարութեան Տաղաւարին առթիւ կատարուած արարողութեանց մասնակցած ըլլալով։ Անոնք իրենց երախտագիտութիւնը յայտնեցին Պատրիարքական Աթոռոյ ցուցաբերած հայրական հոգածութեան համար։