Ս. Յարութեան Տաղաւարը այս տարի եւս տօնուեցաւ Քորոնա Համավարակի սահմանափակումներուն շուքին տակ։ Հակառակ տիրող իրավիճակին, այս մեծ տաղաւարը արժանավայել ձեւով նշուեցաւ մեր եկեղեցիներուն մէջ եւ Պատրիարքական Աթոռէ ներս եւս մեծ եռուզեռ ստեղծեց։ Պատրիարքական Աթոռոյս տնօրինութեամբ, մեր եկեղեցիներուն մէջ մատուցուեցան Տաղաւարի Ս. Պատարագներ, դռնփակ ձեւով։ Իսկ միւս կողմէ, արարողութիւններուն իրենց մասնակցութիւնները բերին եկեղեցիներու սարկաւագաց ու դպրաց դասերը։

Ն.Ա.Տ. Սահակ Բ. Պատրիարք Հայրը, իր մօտն ունենալով վեղարաւոր հայրեր, քահանաներ, սարկաւագներ ու դպիրներ, Ս. Յարութեան Տաղաւարին առթիւ Պատրիարքական Ս. Պատարագ մատոյց Աթոռանիստ Մայր Եկեղեցւոյ մէջ։ Քորոնա Համավարակի պատճառաւ դռնփակ կատարուած արարողութիւնը, նաեւ տեսասփռուեցաւ Աթոռոյս կայքէջէն։ Պատրիարք Հայրը այս առթիւ փոխանցեց իր տաղաւարի պատգամը, որով անգամ մը եւս մերազն ժողովուրդին յիշեցուց Ս. Յարութեան Տաղաւարին եզակի նշանակութիւնը։

Բաց աստի, Ս. Յարութեան Տաղաւարին առթիւ, ըստ ընկալեալ սովորութեան, Պատրիարք Սրբազան Հօր նախագահութեամբ Յարութիւն Ամիրա Պէզճեանի շիրմին մօտ հոգեհանգստեան պաշտօն կատարուեցաւ հանգուցեալ ազգային բարերարին հոգւոյն ի հանգիստ։

* Պատրիարքական Ս. Պատարագը տես՝
https://www.facebook.com/TRArmenianPatriarchate/videos/474045740674650

* Ս. Յարութեան Տաղաւարի առթիւ Պատրիարք Սրբազան Հօր Պատգամը տես՝ https://www.facebook.com/…/a.12758779…/1814981471995061/