Պատրիարքական Տեղապահի ընտրութենէն ետք, քոյր եկեղեցիներ եւս սկսան այցելութիւններ տալով շնորհաւորել Պատրիարքական նորընտիր Տեղապահ Բարձր. Տ. Սահակ Եպս. Մաշալեանը։
Այսպէս անդրանիկ այցելութիւնը կատարեց Հայ Կաթողիկէ համայնքի վիճակաւոր Արհի. Տ. Լեւոն Արքեպս. Զէքիեանը, 17 Յուլիս 2019, Չորեքշաբթի, ժամը 10.00-ին, ընկերակցութեամբ Գերյ. Հ. Վարդան Ծ. Վրդ. Գազանճեանի եւ Գերյ. Հ. Աբրահամ Ծ. Վրդ. Ֆըրաթեանի եւ ընդունուեցան Պատրիարքական Տեղապահ Սրբազան Հօր կողմէ։
Տեղապահ Սրբազան Հայրը շնորհակալութիւն յայտնեց Գերապայծառ Տիրոջ սոյն քաղաքավարական այցելութեան համար եւ կարողութիւն ու յաջողութիւն մաղթեց Աստուածահաճոյ ու եկեղեցանուէր բոլոր գործունէութեանց մէջ։