http://www.taize.ch/temp/en_article2531.html

Թէզէի Էքիւմէնիք Միաբանութեան (http://www.taize.ch/temp/en_article166.html) հիմնադիր՝ Հոգշ. Եղբայր Ռոժէի (http://www.taize.ch/temp/en_article2468.html) յուղարկաւորութիւնը կատարուեցաւ 23 Օգոստոս 2005, Երեքշաբթի ժամը 14.00-ին, Թէզէի Հաշտութեան Եկեղեցւոյ մէջ։ Ռոժէ Եղբայր, որ ծնունդով զուիցերացի բողոքական էր, իր կտակին համաձայն թաղուեցաւ հռովմէական Կաթոլիկ Եկեղեցւոյ կանոններուն համաձայն։
Նախագահեց Հռոմի Ս. Աթոռի Միջեկեղեցական բաժնի վարիչ՝ Բարձրաշնորհ Կարտինալ Ուալթըր Քասփըր։ Իր հետ համապատարագեցին նոյն Միաբանութեան անդամակցող չորս կաթոլիկ վարդապետներ։ Ս. Պատարագի սկիզբը, Թէզէի վանքին շուրջ գտնուող 16 գիւղերու եկեղեցիներուն զանգերը միաժամանակ ղօղանջել սկսան։ 

Ս. Պատարագէն անմիջապէս առաջ, վախճանեալ Ռոժէ Եղբօր կտակին համաձայն Միաբանութեան նոր վանահայր ընտրուած Եղբայր Ալօիս հակիրճ դամբանական մը խօսեցաւ (http://www.taize.ch/temp/en_article2541.html)։ Խօսեցաւ նաեւ Կարտինալ Քասփըր (http://www.taize.ch/temp/en_article2543.html):

Յուղարկաւորութեան արարողութեան մասնակցեցան շուրջ 12,000 հաւատացեալներ, կարեւոր մասամբ երիտասարդներ։ Անձամբ ներկայ էր Գերմանիոյ Նախագահ՝ Հորսթ Քէօհլէր (http://www.taize.ch/temp/en_article2533.html)։

Եղբայր Ռոժէի թաղման կարգը կատարուեցաւ միմիայն միաբանակից վանականներու ներկայութեամբ Թէզէ գիւղի հնադարեան փոքր գերեզմանատան մէջ։

Ն.Ա.Տ. Մեսրոպ Ս. Պատրիարք Հայրը՝ Եղբայր Ռոժէի վախճանման եւ յուղարկաւորութեան առիթով ցաւակցական գիր ուղարկեց Թէզէի Միաբանութեան վանահայր՝ Եղբայր Ալօիսին, սգալով միջեկեղեցական հոգեւոր կեանքին իր անջնջելի դրոշմը թողած վանահօր վախճանը։