Կէտիկփաշայի Ս. Զուարթնոց Եկեղեցւոյ, Զուարթնոց Դպրաց Դաս Երգչախումբի տնօրէն խորհուրդի անդամները, դասուն նախագահ Արժ. Տ. Զաւէն Քհնյ. Պչաքճեանի, 5 Սեպտեմբեր 2016, Երկուշաբթի, այցելեցին Պատրիարքարան եւ ընդունուեցաւ Պատրիարքական Ընդհանուր Փոխանորդ՝ Բարձր. Տ. Արամ Արքեպիսկ. Աթէշեանի կողմէ։
Զուարթնոց Դպրաց Դաս Երգչախումբի ներկայացուցիչները յայտնեցին, որ կը պատրաստուին 2 Հոկտեմբերին տօնախմբել դպրաց դասուն եւ երգչախումբին կրկնակ տարեդարձները կրօնական եւ աշխարհիկ հանդիսութեամբ։ Դպրաց Դասը այս տարը կը նշէ հիմնադրութեան 80րդ, իսկ մանկանց երգչախումբի կազմութեան 60րդ տարեդարձները։ Այցելուներ տեղեկութիւն տուին դպրաց դասու գործունէութեանց մասին։ Մանաւանդ երախտագիտութեամբ անդրադարձան դպրաց դասու երէց անդասներուն գովելի ծառայութեան։ Անոնք, երբեմնի հայահոծ թաղի եկեղեցւոյ պայծառութեան համար հաւատարմօրէն կը կատարէին իրենց վիճակած պաշտօնները։ Անոնք, խնդրեցին Պատրիարքական Աթոռոյ հովանաւորութիւնը։
Նորին Սրբազնութիւնը շնորհակալութիւն յայտնեց սոյն այցելութեան համար։ Այժմէն շնորհաւորեց մօտալուտ տարեդարձը եւ կարողութիւն ու յաջողութիւն մաղթեց Զուարթնոց Դպրաց Դաս Երգչախումբի անդամներուն։