Հարպիյէի Ճեմալ Ռեշիտ Ռէյ Համերգասրահին մէջ, 26 Դեկտեմբեր 2019, Հինգշաբթի, Կեդրոնական Ազգային Վարժարանի ի նպաստ, «Կեդրոնական, ջահդ վառ» խորագրեալ երաժշտական երեկոյթը տեղի ունեցաւ։ Յայտագիրը գործադրուեցաւ՝ հանդիսավարութեամբ Սարին Աքպաշի եւ Պօղոս Չալկըճըօղլուի։
Հանդիսութիւնը պատուեց Ն.Ա.Տ. Սահակ Բ. Ընտրեալ Պատրիարք Հայրը, իր մօտն ունենալով՝ Հոգշ. Տ. Զատիկ Վրդ. Պապիկեանն ու Արժ. Տ. Շիրվան Քհնյ. Միւրզեանը։ Ներկաներու շարքին էին Թուրքիոյ Հայ Կաթողիկէ Համայնքի Վիճակաւոր Արհ. Լեւոն Արքեպս. Զեքիեան, Ղալաթիոյ Ս. Գրիգոր Լուսաւորիչ Եկեղեցւոյ եւ Ազգային Կեդրոնական Վարժարանի Խմակալութեան անդամները՝ գլխաւորութեամբ Ատենապետ Յարութիւն Էպէօղլուի, վարժարանի ուսուցչաց կազմը՝ գլխաւորութեամբ՝ Սիլվա Գույումճեան Մարկոսեանի, բարերարներ եւ երաժշտասէր հասարակութիւնը։
Հանդիսութեան ընթացքին բեմ բարձրացան՝ Կեդրոնական վարժարանի երգչախումբն ու նուագախումբը,ղեկավարութեամբ՝ Յակոբ Մամիկոնեանի, Նուարդ Աւետիքօղլու, Սէրճան Կազէրօղլու, Գարօլին Սարը, Ալեքս Թաթարեան, Լառա Նարին, Օննօ Սիւզմէ, Մարալ Այվազ, Լիտա Քէօսէօղլու, Թաթիանա Պոստան, Մարալ Աթաման եւ Պարթեւ Կարեան։ Համերգը իր աւարտին հասաւ միասնաբար երգուած «Հոյ Նազան» երգով։
Հանդիսութեան աւարտին Ընտրեալ Պատրիարք Սրբազան Հայրը հուսկ բանքը արտասանեց եւ գնահատեց տարուած աշխատութիւնը։ Պատրիարք Հայրը դիտել տուաւ որ վարժարանը նիւթականի կարիք ունի եւ բարի լուրը այն է որ մեր համայնքը վարժարանին օժանդակելի նիւթական զօրութիւնը ունի։ Ուրեմն կը մնար վերջին փուլը, որ էր նիւթական զօրութիւնը ի սպաս դնել Ազգային Կեդրոնական Ազգային վարժարանի ապահով գոյատեւմանը համար։ Նորին Ամենապատուութիւնը երախտիքով յիշեց Ներսէս Պատրիարք Վարժապետեանը եւ արտայայտուեցաւ հետեւեալ ձեւով. «Կեդրոնական Վարժարանը մերն է եւ Սահակ Սրբազանն ալ Կեդրոնականցի է արմատէն, որովհետեւ բոլոր Պատրիարքները Ներսէս Պատրիարք Վարժապետեանի ժառանգորդներն են, հետեւաբար Սահակ Պատրիարքն ալ Կեդրոնականցի է»։ Պատրիարք Հայրը մասնաւորապէս գնահատեց, վարժարանի տեսչութիւնն ու խնամակալութիւնը, կազմակերպիչ յանձնախումբի բոլոր անդամները, երգիչները եւ հանդէսի կազմակերպման մէջ ներդրում ունեցող սպասաւորներները։ Պատրիարք Սրբազան Հօր խօսքերը մեծապէս ընդունելութիւն գտաւ ունկնդիրներու մօտ եւ խանդավառ ծափեր միացան Նորին Ամենապատուութեան արտայայտութեանց։