ԿՈՉ ՄԵՐ ՀԱՄԱՅՆՔԻՆ
Մեր հաստատութիւններու յարգարժան ղեկավարներ եւ մերազն համայնքի սիրեցեալ անդամներ,
Պատրիարքարանի նորաստեղծ Խորհրդակցական մարմինը մեր համայնքային կեանքը ընդհանուր արժեւորումի մը ենթարկած է իր անդրանիկ նիստին ժամանակ ու միաձայնութեամբ յարմար դատած՝ հետեւեալ պարագաները յանձնել հանրային կարծիքի ուշադրութեան.
ա- Թրքահայ համայնքը շուրջ տասն տարիէ ի վեր արտասովոր շրջան մը կը բոլորէ։ Նոր պատրիարքի մը որոնումներով բնորոշ այս գործընթացը ի յայտ բերած է տագնապներ ու ցնցումներ։ Մեր բոլորին ծանօթ պարագաներէ վերջ, վերջին աւելի քան մէկ տարուան ժամանակահատուածին թափ ստացած լարուածութիւնները մեր հաւաքական կեանքը դուրս բերած են իր բնականոն հունէն։ Այսօր այլեւս ժամանակն է այս բեռը թօթափելու, յոռետես մթնոլորտը փարատելու ու մեր ճանապարհը շարունակելու նոր եռանդով ու հաւատքով։ Խորհրդակցական մարմինն ալ յանձնառու է հետամուտ ըլլալ մեր բոլոր խնդիրներու լուծման, ի մասնաւորի առկախեալ ընտրական գործընթացները։
բ- Անցեալ տասն տարիներու առարկայական արժեւորումը մեր բոլորին առջեւ կը դնէ համայնապատկեր մը, որմէ պէտք է դասեր քաղենք։ Մեր հաւաքական կեանքը հասած է անդամալուծուելու սեմին։ Եկած է ժամանակը, որպէսզի այս բոլորէն անհրաժեշտ դասերը քաղենք եւ առանց սխալները կրկնելու այլեւս անցնինք առաջ։
Մեր համայնքը նոր պատրիարք մը ընտրելու բուռն փափաքը ունենալով հանդերձ, դժբախտաբար չէ կրցած հասնիլ նպատակին։ Իւրաքանչիւր ձախող փորձ տեղի տուած է նոր հիասթափութեան, ծնունդ տուած է մեր հաւաքականութենէն ներս զայրոյթի եւ հակազդեցութեան ալիքներու, սակայն մեր համայնքին համար չէ կրցած ապահովել նոր պատրիարք մը։ Ընտրութիւնը բոլորին փափաքն է, սակայն առանց անհրաժեշտ գետինը ստեղծելու, առանց պայմաններու գոյացման միայն փափաքիլ, միայն պահանջելը անբաւարար է։ Այսօր այլեւս ակնյայտ է նոր պատրիարք մը ընտրելու նախապայմանը. փոխադարձ սիրոյ ու յարգանքի հիման վրայ քոնսենսիւս մը։ Բոլորս պէտք է ըմբռնենք այս բանը եւ ըստ այդմ եզրեր ճշդել։
գ- Այս ճշմարտութեան մեկնակէտով՝ նոր պատասխանատուութեան հասկացութիւնով մը պարտաւոր ենք որդեգրել մեր ուղղութիւնը։ Պէտք է սկիզբ տանք շրջանի մը, ուր վերջ պիտի գտնեն ամուլ հակազդեցութիւնները, հեռու պիտի մնանք բարոյագիտական հասկացութիւններէ դուրս մեղադրական արտայայտութիւններէ ու բոլորս պիտի դրսեւորենք զոհողութեան կամք։ Մեր համայնքի բոլոր մարմինները պէտք է զարգացնեն նոր ոգի մը, որով բոլորը զիրար պիտի վերավարկաւորեն, իրարու հաւաքական հեղինակութեան նկատմամբ յարգանքը պիտի վերահաստատեն՝ առանց իրարու իրաւասութեան ու պատասխանատուութեան սահմանները խախտելու, անտեղի ազդեցութեան պայքարներու, հեռու մնալով ապատեղեկատուութիւններէ ու գիտակից՝ մեր հասարակաց միջոցներու արժէքին։ Մեր կոչն է ու մաղթանքը՝ յառաջիկայ Սուրբ Զատկի տօնը այս առումով դառնայ նոր սկիզբ մը։
դ- Ընտրական ճգնաժամի յաղթահարման համար անհրաժեշտ է, որ հասկնալի դառնան մերազն համայնքի իւրաքանչիւր անդամին վիճակած պատասխանատուութիւնն ու զոհողութիւնը։ Անհրաժեշտ են նաեւ լայնախարիսխ համաձայնութիւն մը, համընդգրկուն տրամաբանութիւն մը եւ համատարած ներդաշնակութեան մը ապահովուիլը։ Այս առումով ծայր աստիճան կարեւոր է նաեւ մեր համայնքային մամուլին դերը։ Ոեւէ մէկէն պէտք չէ ակնկալել, որ ձայն չբարձրացնէ։ Ընդհակառակն, զգալի է կարիքը՝ առողջ ու շինիչ, էմփաթիի վրայ խարսխուած վիճաբանութեան մթնոլորտի մը, ուր ամէն մարդ պիտի կարենայ ազատօրէն արտայայտել իր կարծիքը։ Մասնաւորապէս պէտք է այս գործընթացին ցոլանայ ընկերային ցանցերու վրայ ստեղծուած աշխուժութիւնը։ Միւս կողմէ, պէտք չէ անտեսուի, որ մեր հաւաքականութենէն ներս գոյութիւն ունի լուռ մեծամասնութիւն մը։ Այդ տարածուն հատուածներու կողմէ ցուցաբերուած համբերութիւնը մեծագոյն երաշխիքն է՝ մեր հաւաքականութեան հասարակաց մտքի դրսեւորման եւ լայնախարիսխ լուծումի մը ապահովման տեսակէտէ։ Մեր արտայայտութեան ազատութիւնը օգտագործելու ժամանակ, կամայ թէ ակամայ պէտք չէ յայտնուինք վարկաբեկման արշաւներու փակ շրջանին մէջ։ Վարպետութիւն պէտք է ունենանք, որպէսզի վիճաբանութեան մթնոլորտներու մէջ բարձրաձայնուած զգայնութիւնները վերածուին արդիւնքի։ Պէտք է թողունք թիրախաւորել անձեր ու պէտք է կեդրոնանանք սկզբունքներու եւ արդիւնքներու վրայ։ Այս հասունութիւնը մեզի ցոյց պիտի տայ փակուղիի ելքի լոյսը։ Վաղուց ժամանակն է՝ որպէսզի համախմբուինք գետինի մը վրայ, ուր արժէք ունի ոչ թէ ամենաբարձր ձայնով պոռացողը, այլ ամենահաւասարակշռուած ձեւով մտածողը։ Ոչ թէ ամենաբուռն ձեւով մերժողը, այլ ամենապաղարիւն ձեւով արժեւորողը։
ե- Մեր համայնքը ունի անհրաժեշտ ներուժը՝ առանց աւելի յապաղելու այս խնդիրը լուծելու համար։ Լաւ է ուշ, քան երբեք։ Այլապէս պիտի վտանգուի մեր ամբողջ համայնքի կայունութիւնը։ Առանց համախումբ ըլլալու ինչպէ՞ս կրնանք աւելի բարօր ապագայ մը ակնկալել, Պատրիարքարանի գլխաւորութեամբ։
Եկէ՛ք, միասնաբար ձեռք ձեռքի տանք, սիրտ սիրտի տանք, ուս ուսի տանք, հաւատարիմ մնանք մեր հայրերու մեծ ժառանգութեան եւ արժանի ըլլանք մեր Սուրբ Եկեղեցւոյ օրհնութիւններուն։ Օգտագործուինք մեր պետութեան կողմէ մեզի տրուած հնարաւորութիւններէն։ Մեր զաւակներուն, երիտասարդներուն փոխանցենք ինքնութիւն մը, որով պիտի կարենան հպարտանալ։ Միասնաբար քաղենք մեր զօրակցութեան պտուղները եւ անոնց արդիւնքը վայելենք՝ որպէս եղբայրներ բաժնելով։ Անտարբեր չմնանք բոլոր անոնց դէմ, որոնք կը փորձեն մեզ տանիլ դէպի անորոշութիւն ու դէպի ծայրայեղութիւն։ Փակենք մեր ականջները արկածախնդրութիւններու դիմաց, որոնց հետեւանքով ապագային կրնանք զղջալ։ Զիրար վերագտնենք բանիմացութեան մէջ։ Վստահինք իրարու, երկու օր վերջ զիրար մեծ աւետիսով ողջունելու ժամանակ, իրարու հետ տօնական ուրախութեամբ ողջագուրուելու ժամանակ մեր սիրտերն ու ճակատները ըլլան բաց։
ՊԱՏՐԻԱՐՔՈՒԹԻՒՆ ՀԱՅՈՑ ԹՈՒՐՔԻՈՅ