Ըստ աւանդութեան, Պատրիարքարանի տօնածառը այս տարի եւս զարդարուեցաւ։ Պատրիարքարանի Տիկնանց Կազմի անդամուհիներ, 21 Դեկտեմբեր 2017, Հինգշաբթի, այցելեցին Պատրիարքարան ու զարդարեցին տօնածառը եւ Պատրիարքարանի շքամուտքը։

Աշխատութեան աւարտին, Տիկնանց կազմն ու Պատրիարքարանի անձնակազմը, ընդունուեցաւ Պատրիարքական Տեղապահ Բարձր. Տ. Գարեգին Արքեպս. Պէքճեանի կողմէ։ Ներկայ եղաւ նաեւ Տիրամայր Մարի Մութաֆեան։ Աւանդական թէյասեղանի շուրջ ներկաներ առիթը ունեցանմտերմօրէն զրուցելու ու մօտակայ Ամանորի սեմին բարեմաղթութիւններ փոխանցելու։ Այս առթիւ, Տեղապահ Սրբազան Հայրը գնահատեց տիկիններու աւանդականի վերածուած աշխատութիւնը եւ իրենց նուիրեց Պատրիարքական Աթոռոյս 2018ի Եկեղեցական Օրացոյցը։ Սրբազան Հայրը, այս առթիւ բարի տարի մաղթեց ներկաներուն ու աղօթեց որ իրենց տուներուն մէջ ներկայ ըլլայ Աստուծոյ օրհնութիւնը։