Պատրիարքական Ընդհանուր Փոխանորդ Բարձր. Տ. Արամ Արքեպս. Աթէշեան, 12 Օգոստոս 2016, Ուրբաթ, Ժամը 21.00-ի, ընկերակցութեամբ Ս. Գրիգոր Լուսաւորիչ Եկեղեցւոյ Հոգեւոր Հովիւ Հոգշ. Տ. Յարութիւն Աբղ. Տամատեանի եւ Թաղային Խորհուրդի ատենապետ՝ Լեւոն Շատեանի, այցելեց Գնալը Կղզիի Կազդուրման Կայանը։ Այստեղ, դիմաւորուելէ յետոյ Տնօրէն Թամար Նէրկիզէ տեղեկութիւններ առաւ Կայանի աշխատութեանց մասին, որոնց կարեւորագոյներէն մին կը հանդիսանար Կիրակի առաւօտ Կայանի Ճամպազեան Խաղավայրին մէջ կատարելի Ս. Աստուածածնի Տաղաւարի առթիւ կատարելի աւանդական Քերմէսը։ Արդէն իսկ, քերմէսի աշխատութիւնները մեծ թափով կը շարունակուէին կայանի երթիկին տակ։ Հանդիպման ներկայ եղաւ նաեւ Խնամատար Մարմինէն Նաժտա Շատեան։
Ապա, ներկաներ մէկտեղուեցան մանուկներու հետ եւ մանուկներ բառխաղ խաղացին։ Սրբազան Հայրը ըսաւ թէ՝ այս խաղը Երջանկայիշատակ Եղիշէ Պատրիարքը խաղալ կուտար Երուսաղէմի մէջ, որպէսզի մանկանց բառամթերքը զօրանար։ Կայանի տասը աշակերտներ, իրենց ընկերներու եւս ներկայութեամբ մրցակցեցան ու մէկական տառերը օգտագործելով բառեր կազմելու ջանացին։ Մօտ մէկ ժամուայ մրցումէն յետոյ, առաջնութիւնը շահած մանկան փոքր յուշանուէր մը յանձնուեցաւ, մինչ այդ Սրբազան Հայրը փոքրիկ նուէրներ տուաւ մանկանց եւ հսկիչներուն։
Կայանի Տնօրէնութիւնը եւս առիթ համարելով մօտաւոր քերմէսը եւ սոյն այցելութիւնը, Նորին Սրբազնութեան յանձնեց յիշատակի նուէր մը, որուն վրայ կը գտնուէին Տէրունական Աղօթքի, Շնորհք Պատրիարքի, Հայոց Այբուբէնի եւ Կայանի 50-ամեակի նկարները։ Սրբազան Հայրը, շնորհակալութիւն յայտնեց եւ յաջողութիւն մաղթեց մօտաւոր Քերմէսին սեմին։
