Ս. Գրիգոր Լուսաւորիչ Եկեղեցի, Գուզկունճուք
(Çarşı Cad. No: 49, 34674 Kuzguncuk)
Հեռ.՝ (0216) 341-5002
Ել-նամակ՝ info@surpkrikorlusavoric.com
Կայքէջ՝ http://www.surpkrikorlusavoric.com
Ի սկզբանէ փայտաշէն եկեղեցին կառուցուած է 1835ին Ստեփանոս Պատրիարքի շրջանին, Արքունի ճարտարապետ Յովհաննէս Ամիրա Սէրվէրեանի բարերարութեամբ։ Իսկ Պօղոս Աղա Շալճեանի բարերարութեամբ ի հիմանէ վերաշինուած է 1861ին։ Կը գտնուի Գուզկունճուքի նաւամատոյցին դիմացը։ Եկեղեցին Պէշիկթաշի Սուրբ Աստուածածին Եկեղեցւոյ նման գմբէթ մը ունի։ Սակայն ի տարբերութիւն Պէշիկթաշի եկեղեցւոյ, դուրսէն տեսանելի է։ Խորանին ետեւ կայ երկյարկանի աշտարակաձեւ զանգակատուն մը գմբէթազարդ տանիքով։ Եկեղեցւոյ դասի ընկուզենի բազրիքին վրայ քանդակուած են ծաղիկներ ու տերեւներ, որոնք շինուած են այդ շրջանի արքունի շինութեան ատաղձեղէնի հայթայթիչ Գալուստ Աղա Քէմհաճեանի կողմէ։ Սեղանի ներքնամասը ունի կաթողիկէի ձեւ եւ ոսկեզօծ է։
Ներքնապէս բարեզարդուած է 1967ին։ Եկեղեցւոյ բակին մէջ 1910 թուակիր աղբիւր մը կը գտնուի։
Եկեղեցին վերջին նորոգութիւնը կատարուած է 2005 թուականին, օծուած ու պաշտամունքի վերաբացուած՝ ձեռամբ Ամեն. Տ. Մեսրոպ Բ. Պատրիարքի։
Հիւսիսային պատին տակ կը հանգչի տեղւոյն քարոզիչ Յովհաննէս Եպիսկոպոս Սէթեան (1800-1875)։